Þá er tíðinni í Blöndubakkanum formlega lokið… Afhenti nýjum eiganda lyklana í gær þannig að ef einhver ætlar að kíkja í heimsókn þá mæli ég með að viðkomandi hringi á undan sér. Er núna hjá Benna og Iðunni sem voru svo góð að skjóta yfir mig skjólhúsi í c.a. 1 mánuð eða þangað til að ég flyt til Grundarfjarðar. Þar þurfum við svo að búa inná tengdó í einhvern x tíma því við fáum nýja einbýlishúsið ekki afhent fyrr en um áramótin og þá á eftir að taka til hendinni og parketleggja og svoleiðis.

Það var mikill hasar um síðustu helgi í flutningunum. Pantaði bíl frá Ragnari og Ásgeir sem var plantað fyrir utan blokkina á laugardaginn. Smalaði mannskap til mín í þetta. Gústi bróðir, Gísli Valur, Soffi, Dabbi frændi ég og svo Steini Jobba sem mætti í restina. Ruppuðum öllu draslinu út á nokkrum klukkutímum. Tekið á því svo um munar. Svo vorum við Rúna að þrífa allan sunnudaginn og vorum síðustu nóttina á svampdýnum í herberginu hans Kristjáns. Síðasti hluturinn út úr íbúðinni var skúringarfatan á mánudagsmorgun.
Við höfðum það fínt í þessi rúmlega tvö og hálft ár sem við vorum þarna. Gott að búa í bökkunum. En þá er það bara næsta skref í lífinu að flytja heim í fjörðinn. Mig hlakkar rosalega til enda orðinn hundleiður á að hangsa hérna einn í bænum.

Svo á maður fokkings enn eitt afmælið á föstudaginn og eru allar afmæliskveðjur vinsamlegast afþakkaðar. Þeim sem vilja minnast mín er bent á bankareikninginn minn.

Enda þetta á þessu snilldar slagara eftir hann Serj félaga minn. Tussu flott lag.

Þangað til næst….

By Tommi Baggins

Er nýlentur á klakanum aftur eftir árshátíðarferð EJS til Búdapest. Þetta var barasta þræl fínt allt saman, Tók kellu með og skemmtum við okkur bara þokkalega vel.

Þetta hófst allt saman á föstudaginn þegar við áttum flug til Ungverjalands. Fórum til Keflavíkur uppúr tvö, fengum okkur að borða á kaffi duuuuuuus eða eitthvað svoleiðis, fínustu kótilettur mmmm. Fórum svo á völlinn því við áttum flug kl 17:40. Versluðum eitthvað smotterí og settumst svo á barinn og fengum okkur hressingu áður en haldið var af stað.
Lentum í Púddabest um miðnættið og vorum komin uppá hótel rúmlega eitt að Ungverskum tíma. Þá var fyrri hópurinn (sem hafði farið deginum áður) orðinn vel hress og á leið út á lífið. Við Rúna nenntum því varla og fórum bara uppá herbergi. Hitti Soffa aðeins og fórum svo að sofa.
Vöknuðum snemma á laugardagsmorgninum og kíktum aðeins niður í bæ. Fórum svo í skoðunarferð um borgina til að sjá svona hvað þetta hreysi hefur uppá að bjóða. Jú jú, það eru svo sem slatti af fínum byggingum og svoleiðis en mesti hlutinn af þessu er í svolítilli niðurníslu. Þegar þessi ferð var búin fór maður bara í að græja sig fyrir árshátíðina. Þetta var svakalega glæsilegt allt saman. Ræðismaður Íslands í Ungverjalandi var búinn að kippa í nokkra spotta og úr varð þessi snilldar veisla. Veislan var haldin inní listasafni þar sem veislur eru almennt ekki leyfðar. Fín skemmtiatriði, maturinn lala en allt annað var algjör snilld. Við Rúna og Soffi fórum rosalega sátt uppá hótel eftir þetta kvöld og lögðumst sátt til hvílu. Daginn eftir átti fyrri hópurinn að fara heim, Það var nú heldur súrt á þeim andlitið að sjá þessi grey hríðskjálfandi úr þynnku kl 11 á sunnudagsmorguninn. Hálf vorkenndi þessum greyum bara því flestir þeirra voru búnir að vera í vafasömu ástandi 3 daga í röð. Við Rúna fórum bara að versla í einhverju molli þarna og eyddum nánast öllum sunnudeginum í það. Fórum svo út að borða á snilldar Argentísku steikhúsi um kvöldið. Fengum okkur alveg tjúllaðar nautasteikur með öllu. Fórum svo uppá hótel og svo bara í bælið fljótlega. Rúna náði svo að versla restina í morgun þegar við tókum göngugötuna með stæl.
Búdapest er svo sem fínasta borg, doldið skítug en annars bara sæmileg. Nóg af menningu og sögu þarna sem hægt væri að gleyma sér í í 2 vikur ef út í það er farið. En ég var skítfeginn að komast heim aftur.

Þangað til næst…..

Þetta er nú meira þunglyndisbölið alltaf á manni. Nú er ég nýkominn að vestan eins og svo oft áður og ég er bara ekki að fýla þetta. Nú dauðlangar mig heim enda er hundleiðinlegt að hangsa hérna einn í bænum. Ég fór með Kristján Frey á leikskólann í morgun, fékk að kveðja hann almennilega sem er svolítill munur frá því síðast þar sem ég þurfti að rjúka af stað án þess að kveðja kóng né prest. Æi þetta er bara einn og hálfur mánuður í viðbót.
Við þurfum að afhenda íbúðina 30 okt sem þýðir eftir skrattans 14 daga. Það á eftir að gera of mikið hérna. Það er alveg slatti af kössum komnir vestur en það er samt svo fokking mikið eftir. Öll búslóðin að sjálfsögðu, veit ekki hvernig maður á að komast yfir þetta allt. Við tökum síðustu helgina í október í það að flytja, Þá vantar okkur alla þá hjálp sem býðst… áhugasamir vinsamlegast skráið ykkur hér fyrir neðan. Líka ef einhver á flutningabíl sem hann þarf ekki að nota þá væri það vel þegið, líka ef viðkomandi væri með meiraprófið til að keyra kvikindið.

Um næstu helgi er förinni heitið til Búdapest á árshátíð EJS. Við fljúgum út á föstudaginn og komum heim á mánudag. Þetta verður vonandi fínt, kannski get ég keypt mér linsu á myndavélina… sjáum til. Þannig að það er nóg framundan, það er ekki það.

Ætli það sé ekki best að enda þetta á snilldar myndbandi sem ég hvet alla til að horfa á. Boðskapurinn í þessu er svo fagur að það hálfa væri miklu meira en nóg. Svo er þetta líka svo gasalega smekklegt og fagmannlega unnið myndband að Spielberg sjálfur myndi stoltur setja nafnið sitt við þetta… Njótið.

Þangað til næst….

Heimilislausum manni vantar húsnæði frá 30 október til og með 30 nóvember.
Um er að ræða mann á fertugsaldri, frekar subbulegur en getur spreyjað sig
með ilmsöltum ef farið er að slá í. Nokkuð þrifalegur (pissar bara stundum útfyrir),
skemmtilegur í fasi og með ljósa lokka á kolli sem farnir eru að rytjast af.
Maðurinn á það til að hangsa í tölvu langt frameftir degi og af því hlýst lítið
sem ekkert ónæði fyrir viðkomandi… þ.e. ef að hægt er að loka hann einhvers-
staðar inni.
Þarf að hafa aðgang að klósetti og helst sturtu, samt ekki nauðsynlegt.

áhugasamir sendið póst merkt sveinkamál á homless@homeless.is

Þangað til næst….